بسبوسة الشيف فاطمة ابو حاتي
السلام عليكم ورحمة الله وبركاته يحبايبي ❤
بسبوسة سهلة جدًا وبسيطة وإن شاء الله مكوناتها متوفرة ❤
المقادير 🍽
نص كيلو من دقيق السميد
كوباية لبن دافي
٣\٤ كوباية سمنة و ١\٤ كوباية زيت (على بعض بيبقوا كوباية مادة دهنية دافية)
نص كوباية سكر
٤ معالق جوز هند
معلقتين لبن بودرة
معلقة صغيرة بيكنج بودر
معلقتين كبار من عسل النحل الأبيض
الطريقة :
نحط على السميد المكونات الجافة ( جوز الهند ومعلقتين لبن بودرة والبيكنج بودر ونص كوباية السكر) ونقلب كويس مع بعض ، بعدين نحط كوباية المادة الدهنية الدافية ونقلب وبعدين كوباية اللبن الدافي وعليها معلقتين العسل (أو معلقتين عسل جلوكوز أو معلقتين شربات كنافة) ونضيفها للخليط ونخلط المكونات مع بعض بالمعلقة (متعجنوش)
صينية مقاس ٣٢ مدهونة طحينة أو سمنة ونحط فيها الخليط ونفرده كويس ولو عندك مكسرات حطيها عالوش بتبقى جميلة جدًا ودخليها الفرن على درجة 180 لمدة ٣٥ دقيقة وتابعي كل شوية بردو لو احمرت قبل كدا أو بعد (خليكم مصحصحين😂)
بعد ١\٣ ساعة نبدأ نعمل الشربات
مكوناته :
كوبايتين سكر وكوبايتين ماية
الطريقة :
هناخد كوباية واحدة سكر وعليها معلقتين ماية ونكرملها عالنار لحد م يبقى لونه دهبي وبين كل فترة والتانية هنهز الوعاء (متحطوش معلقة عشان ميكلكعش) وبعدها حطوا كوبايتين الماية وياريت تكون ماية سخنة عشان تفك على طول وبعدين نضيف كوباية السكر ال فاضلة ونسيبه يغلي دقيقتين كدا ونحط معلقة سمنة بلدي ونطفي النار
نطلع البسبوسة من الفرن ونسقيها وهي سخنة ويكون الشربات سخن جدًا كمان
وصفة سهلة جدًا جدًا اعملوها وادعولي واعملولي كومنتات تفرحني ، بحبكم و بالهنا والشفا💖
بارك الله فيكم
ردحذف